Fyrsta djammið í London

Jæja... þá er ég búin að fara á fyrsta alvöru djammið í London! Sú slóvenska kom til mín um hálf 9 í gærkvöldi með heila flösku af Martini Bianco og eina stóra og eina litla flösku af einhverjum bláum vodka gosdrykk. Stóra flaskan af bláa drykknum var fljót að fara en ég skipti svo yfir í Breezer - leist ekkert á að fara að drekka Bianco enda aldrei fundist það gott á bragðið. Fröken Slóvenía var hins vegar ekkert að tvínóna við hlutina, drakk það óblandað og án klaka. Fyllti á litla vatnsflösku sem hún stakk í veskið sitt og restina drakk hún áður en við lögðum af stað! Henni fannst ég óttaleg kerling að sötra Breezer en ég kom henni í skilning um það að ég drykki það sem ég vildi og á mínum hraða. Hún virtist hafa miklar áhyggjur af því að hún yrði ekki nógu drukkin þannig að Bianco-ið rann oní hana á undraverðum hraða!
Við tókum lestina niðrí bæ upp úr 11, röltum aðeins um á Picadilly og Leicester Square eins og hinir túristarnir, ætluðum að kíkja á Zoo Bar en þar var svo löng röð að við nenntum ekki að bíða en enduðum þess í stað inn á klúbb sem heitir að mig minnir On Anon og er í Trocadero byggingunni. Klúbbur á mörgum hæðum, algjör völundarhús en það var samt alveg ágætlega gaman. Og djammfélagi minn var ekkert að tvínóna við hlutina, kyssti annan hvern mann sem yrti á hana og þá er ég ekki að tala um neina mömmukossa. Ég var eins og fermingarstelpa við hliðina á henni... hmmm... kannski ekki alveg nógu góð samlíking á þessum síðustu og verstu tímum en ég miða þetta við hvernig fermingarstelpur voru þegar ég fermdist :-) En stúlkukindin var nú samt ekki á því að samþykkja þessa náunga sem hún var að kyssa... nei... þeir voru allir með of stutta fingur! Hún trúði einarðlega á samræmi milli fingralengdar og lengdar annarra og skemmtilegri líkamshluta þannig að hver sjarmörinn á fætur öðrum mátti drattast í burtu með skottið milli lappana! Og þegar svo upp var staðið þá var það nú reyndar fermingarstelpan sem lenti á sjéns ;-) Voða sætur írsk-amerískur Lundúnabúi.... tölum ekki meira um það en jú, hann var með fallegar hendur og langa fingur ;-)
Dagurinn í dag hefur svo að sjálfsögðu verið í samræmi við fjölda Breezera og svefnstunda, eins og við var að búast!

Langur dagur

Var að vinna til rúmlega 8 og alveg búin að fá þokkalega nóg þegar ég kom heim. Ekkert í ísskápnum og ég nennti hvort eð er ekki að elda. Rölti út á Prince of Teck til að fá mér einn öllara og reyna að ákveða hvað ég ætti að borða. Þar sem ég sat í rólegheitum með bjórinn minn og gemsann (sem er hinn ágætasti félagsskapur þegar kona situr ein á ölstofu) kom til mín stúlka og spurði hvort ég væri að bíða eftir einhverjum. Nei, nei, ekki var ég það. Hún fékk þá að tylla sér hjá mér, var frá Slóveníu og í fríi í London í viku og vantaði sárlega einhvern til að djamma með, hvort ég væri ekki til í að klúbbast (go clubbing) með henni. Ekki var ég nú alveg til í það, amk ekki þetta sama kvöld en samþykkti að kíkja með henni út á lífið annað kvöld. Við röltum nú samt á írska pöbbinn sem er þarna í nágrenninu og þar var hin ágætasta stemning og meira að segja opið til miðnættis, sem hlýtur að teljast óvenjulegt :-)

Björn og Lilja í heimsókn

Tókst að læsa mig úti, algjör snilld... gleymdi jakkanum mínum í vinnunni og aldrei þessu vant voru lyklarnir í vasanum en ekki í veskinu :( Jason bílstjóri reddaði mér, kom við á leiðinni út á flugvöll. Við Heide pöntuðum indverskt og borðuðum uppi hjá mér, voða notalegt. Björn og Lilja komu svo síðar um kvöldið frá Kaupmannahöfn