Sumarfríið í stórum dráttum

29. júní - 4. júlí New York.
Vá hvað það er geggjuð borg, full af lífi, orku, hávaða, fallegu fólki, skrýtnu fólki, ljótu fólki, skemmtilegu fólki, leiðinlegu fólki.

4.-12. júlí Bahamas.
Dásamlegur staður, yndislegt fólk, afslappað, heitt, rakt, góður matur, vondur matur, höfrungar, jet-ski, flottir strákar...
13.-14. júlí New York aftur.
Heitt, heitt, heitt... Hefði getað lent á sjéns með amerísk-írskum lögreglumanni en lét það vera (Ms Prim&Proper smyglaði sér sem sagt með í þetta sumarfrí :( og hékk í mér eins og bráðnað tyggjó á gangstétt)

15. - 30. júlí Ísland.
Stykkishólmur - Seyðisfjörður - Þórshöfn á Langanesi - Reykjavík. Þannig var rúnturinn í þetta skiptið. Frábært að koma úr hávaðanum í New York í þögnina í Hólminum, hægt að heyra manninn í þarnæstu götu negla með hamrinum sínum. Og á Seyðisfirði kæfði þokan flest hljóð þannig að það var ennþá meiri þögn. Og á Þórshöfn var líka þögn, fyrir utan malið í ættingjum mínum sem söfnuðust saman þessa helgi og drukku, átu, syntu í sjó, fóru í kirkju, dorguðu, sungu og skemmtu sér. Og síðast en ekki síst ber að nefna sjóbaðið sem helstu hetjur fjölskyldunnar tóku þátt í. Ber þar helst að nefna undirritaða ásamt 7 ára bróðursyni. Ekki hef ég sönnun fyrir mínu eigin sjóbaði en Máninn minn var hetja dagsins, ekki aðeins stakk hann sér til sunds í ísköldum sjónum heldur vann hann líka til verðlauna í dorgveiðikeppni ættarmótsins, veiddi minnsta en jafnframt óvenjulegasta og flottasta fiskinn.

Myndir væntanlegar fljótlega

Nú og síðan ég kom til London hefur tíminn að mestu farið í (fyrir utan vinnu) þvotta, tiltekt, frágang (ótrúlega mikið af smádóti og drasli sem kemur uppúr ferðatöskunum), leti, leti og leti. Eyddi t.d. gærdeginum flatmagandi í garðinum mínum með sunnudagsblaðið, slatta af SuDoku gátum, mp3 spilarann minn og gemsann og náði 5 tímum án þess að leiðast hið minnsta.
Svo er lífið smám saman að komast í fastar skorður, heitt og sveitt í lestinni á morgnana, ískalt í vinnunni, heitt og sveitt í lestinni á leiðinni heim... ekki farin að mæta í ræktina ennþá en geri það í vikunni... eldaði mat í gærkvöldi sem er alveg saga til næsta bæjar... alveg látið eiga sig að hafa samband við franska kokkinn sem kallar mig 'baby' í öðru hverju orði í sms-unum... en geri það nú fljótlega til að reyna að koma því inní hausinn á honum að ég sé ekki 'his baby'!!!!
En nú ætla ég að reyna að vinna örlítið...
tjaó beibs ;-)